سلسلة مقالات تهم كل المنتمين لتخصص التربية الخاصة
(أخصائي التربية الخاصة) (إبدأ صح)
خد مني الحجات دي
1- حابب المجال ومش شرط تكون خريج علم نفس كلمة بقولها واللي يزعل يزعل لا مش شرط تكون خريج علم نفس لو حابب مجال التربية الخاصة وقلبك فية الرحمة ونفسك تساعد طفل ملهوش حد غيرك وتساعد أب معرض لكل أساليب النصب والابتزاز تبقه افضل من خريج علم نفس حافظ ومش فاهم خد الخطوة التانية
2- نمي مهاراتك خدلك دبلومة مهنية قسم علم النفس التربوي تخصص صعوبات تعلم او تربيه خاصة اللي يريحك وتحس انك ميال إلية وعاوز تكمل لحد ماجستيرودكتوراة يبقه تمام إقرأ قي المجال وتعرف على الاخصائين الشطار وأسال وأستشير عن الصغيرة قبل الكبيرة واكتب كل معلومة تسمعها هتفيدك إقرأ كتير خدلك كورس مقاييس نفسية إقرأ نظريات علم النفس كويس وحاول تربط بينها وبين البرامج وبين التطبيق بعدين خد الخطوة الثالثة
3- التواضع خليك متواضع مع نفسك ومع ولي الامر ومع الطفل نفسة ومع زملاؤك خد المعلومة من الصغير قبل الكبير ومتتكبرش على اي معلومة وأدي المعلومة للصغير والكبير علشان ربنا يبعت اللي يديك المعلومة بدون مقابل وديما أعرف أن فوق كل ذي علماً عليم
4- مظهرك الشخصي شيء مهم أنت واجهة المكان اللي انت فيه ووجهة المجال اللي بتشتغل فيه خليك وجهه مشرفة تليق بأخصائي تربيه خاصة ذو شخصية أمام ولي الامر وأمام الطفل بلاش الاستهتار في لبسك ومظهرك العام لأن دي صدقني هتفرق معاك كتير متستهترش بالطفل ممكن يشوف حجات ويلاحظ حجات يحكيها بعدين
5- ارمي مشاكلك الشخصية برة الباب اللي فية جلستك ولي الامر اللي جايلك ده اصلا جي فيه هموم ربنا اللي يعلم بيها والطفل اللي بين أيدك فية ألم ربنا وحده هوه اللي يعلمة يبقه انت لازم يكون وشك بشوش وتحاول تفرق بين شغلك وظروفك الشخصية وضحكتك ودعابتك متفرقش جلستك
حكمتي ليكم النهاردة
النظرية بلا تطبيق علم مبهم
والتطبيق بلا نظرية تقليد أعمى
أنا لسه مخلصتش معاك إستناني الحلقة الجاية هكلمك عن شيء وظاهرة مهمه جداً بتأثر سلبياً على حالات كتير وتنتهي نتائج العمل بالفشل الزريع ويطلع حجة البليد مش مسح السبورة لا حجة البليد الطفل غير قابل للتعلم
الحلقة الجاية بعنوان
خليك موضوعي
كتبها ... أشرف بلتاجي
أخصائي تربية خاصة
باحث ماجستير قسم علم النفس
ليست هناك تعليقات: